2023.10.23
“Azərlotereya”da yeni təyinat
“Azərlotereya” ASC-də kadr dəyişikliyi olub. Şirkətin İnsan resursları və inzibati məsələlər üzrə yeni direktoru Leyla Namazova təyin edilib.
İnsan resurslarının idarə edilməsində 15 ildən artıq təcrübəyə malik Leyla Namazova regional və qlobal miqyasda fərqli sektorlarda böyük və müxtəlif işçi heyətlərinin dəstəklənməsi sahəsində yüksək biliyə sahibdir.
O, bundan öncə “Kapital Bank”da İstedadların cəlb edilməsi və biznes partnyorluq şöbəsinin rəhbəri vəzifəsində çalışıb. Həmçinin 2016-2023-cü illərdə “Borusan Cat”da insan resursları üzrə müxtəlif rəhbər vəzifələrində fəaliyyət göstərib. Leyla Namazovanın təcrübəsinə 2013-2016-ci illərdə ADA Universitetində İnsan resursları üzrə kurator, 2013-cü il “Embafinans” kredit təşkilatında İnsan resursları üzrə direktor, 2007-2013-cü illərdə isə “Xalq” Bankın İnsan resursları üzrə rəhbəri kimi fəaliyyətləri də daxildir.
Effektiv fəaliyyətin əsas şərtlərindən olan kadr siyasətinin peşəkarlığına önəm verən “Azərlotereya” işçilərinin karyera imkanlarının genişləndirilməsinə xüsusi diqqət yetirir.
Şans oyunları sektorunda innovativ xidmət göstərmək missiyasını daim yerinə yetirən “Azərlotereya”nın kadr siyasətində həyata keçirdiyi yeniliklər əməkdaşların iş prosesini daha səmərəli və effektiv hala gətirir, onların peşəkar inkişafına dəstək göstərir. Kadrlarla işgüzar imkanları yaradan “Azərlotereya”nın işçilərin təcrübə və bacarıqlarını qiymətləndirərək müvafiq vəzifələrə təyin etməsi həm onların motivasiyasının artırılması, həm də şirkətin məhsuldarlığının səmərəliliyinə böyük töhfə verir. “Azərlotereya”da işçilər peşəkarlıq səviyyəsinin yüksəldilməsi, onların inkişafının artırılması məqsədilə münbit şərait və rəqabətə davamlı əmək haqqı ilə təmin olunurlar.
Qeyd edək ki, Azərbaycan Respublikası Prezidentinin 23 noyabr 2001-ci il fərmanına əsasən yaradılmış “Azərlotereya” ASC 2021-ci ildə Türkiyənin dünyaca nüfuzlu “Demirören Holdinq”inə idarəetməyə verilib. “Demirören Holdinq” hazırda Türkiyə və beynəlxalq arenada uzunmüddətli və davamlı sərmayə yatırım həyata keçirmək, iqtisadiyyatda əlavə dəyər yaratmaq məqsədilə KİV, daşınmaz əmlak, turizm, təhsil, texnologiyalar və şans oyunları kimi müxtəlif sahələrdə fəaliyyət göstərir.